አቶ› ተስፋዬ ገብረአብ እንደ ፓስተርነት እንደሚቃጣው አላወቅኩም ነበር?

(ዓለምነው ሽፈራው)፡ ጉድ ሳይሰማ መስከረም አይጠባብም እንዲሉ፤ በመስከረም መገባደጃ ላይ ተስፍሽ ጉድ ይዞ ብቅ። ልክ መስከረም ሲጠባ «የስደተኛው ማስታዎሻ» ብዬ የከተብኩቱን ክታቤ አኮመኩማችኋለሁ ብሎ ብዙውን አማሎት እንደነበር ምስክር አይሻም። ተጠበቀ ወይ ፍንክች። በማተሚያ ቤት ተሳበበ። ብዙሃኑም (እኔንም ጨምሮ)  መስሎት ነበር።  

መስከረም ሲገባብደድ የተስፍሽ (መርዝ አዘል) ‹መጽሐፍ?› በየድረ ገጹ እና ማኅበራዊ ድረገጹ በነጻ መለቀቁን ሰማን። በነጻ በማግኜታችን ብዙዎቻችን ብንደሰትም፤ ሰው የደከመበትን እንዴት እንዲህ ያለ ምንም ዋጋ ይበተንበታል ብለንም ብዙዎች ተቆጭተዋል፣ ተቆጭተናል፤ ቁጭታቸውንም በድረገጽ እና በማኅበራዊ ድረገጾች የገለጽም ነበሩ። የሆነው ሆኖ መርዛማው መጽሀፍ መነበብ ጀመረ። ወደ ውስጥ ሲዘልቁ ወደ አርባ የሚጠጉ እዕሰ ጉዳዮችን ይዟል። ታዲያ በሃያ ስምንተኛ ላይ የሰፈረው ርዕሰ ጉዳይ (ስለ አቡነ ተክለ ሃይማኖት) ትንሽ ጆሮዬን ኮርኮር አደረገኝ እና አነበብኩት። በዚህ ርዕሰ ጉዳይ ተስፋዬ ወይ በደንብ እውነቱን በጻፈ፤ አለያ  ባያነሳው በተሻለው በነበረ። « እከሌ የሚባል እንዲህ ብሎ ጽፎ እንዲህ ሆኖ...ምንትሮስ  ቀባጥሮስ እያለ » ይልና የራሱን አመክንዮ በማከል እንደ ማጣቀሻ ሊያደርግ ይሞክራል። ወይ ካየ ማጣቀሻ፣ ማስረጃው ይኼው ባለን፤ ካላየ ደግሞ እንደ ጨዋነቱ (እዚህ ላይ ጨዋ ሲል የዋህ፣ ጥሩ መግባር ያለው ለማለት እንዳልሆነ ልብ ይሏል)  አርፎ በተቀመጠ። በዚያ ላይ እሱ የሚመስለውን ለራሱ ማመን ሲችል፣ ትውልዱን  የእንመን አይነት ጥያቄም ይቃጣዋል። በዚህም ሳይበቃው ቅዱሳኑ ትውልዳቸው ከዚህ ዘር ስለሆነ፤ ምንም ሳይሆኑ አልፈዋል፤ አሁን ግን ጥያቄ ልናሳባቸው ይገባል የሚል  ዘረኝነትንም ይሰብካል። ቅዱሳኑስ እንደእሱ እንደ እኔ ሰው በመሆናቸው (በግብር፣ በምግባር፣ በቅድስና ሳይሆን በተፈጥሮ) ከእከሌ ተወለዱ ይበለን። እውነት ነው የትውልድ ሃረጋቸው ይታውቃል። በቅድስናቸው፣ በአማላጅነታቸው የምናምነው ግን ኢትዮጵያዊ ስልሆኑም አይደለም። እሱ እንዳለው ከሸዋ፤ ከጎጃም፣ ከጎንደር ከትግራይ፤ ከወሎ፣ ከወላይታ፣ ከጉራጌ ወ.ዘ.ተ. ስለሆኑም አይደለም። ከግብጽ፣ ከሶሪያ፣ ከአርመን፣ ከሮም፣ ከእስራኤል ስለሆኑም አይደለም። ስለተሰጣቸው ቃልኪዳን እና ስለአማላጅነታቸው ነው። 

ለቅዱሳኑን ታምራት እንደማነጸጻሪያ የተጠቀመው ደግሞ ክብር ይግባውና የኢየሱስ ክርስቶስን ስም ነው። አሁን ተስፋዬ ኢየሱስ ክርስቶስ ኢትዮጵያ ውስጥ አለተውለደም እና  ኢየሰስ ክርስቶስ የኢትዮጵያ አምላክ መሆኑን እንጠይቅ ለማለት ትንሽ እንደቀረው እገምታለሁ። እምነት በዘር እና በትውልድ የሚሆን መስሎት። 

ይህም ብቻ አይደለም ተስፋዬ እስከአሁን  በቅዱሳኑ ላይ ጥያቄ ለማንሳት የጀመሩት (በህይዎት ያሉትን) ትውልድቸው ከዚህ ስለሆነ እና ትንሽ ቡጢን ስለቀመሱ አፋቸውን ዘግተው ቁጭ ብለዋል ይላል። እንደዚህ ሲል እሱ ከኢትዮጵያ ውጭ ስለሚኖር በቡጢ የሚለኝ የልም ብሎ አስቦ ይሆን አላውቅም። ለሱ እንደሚመስለው በዚች ምድር ቡጢ ባይቀምስም፤ እጥፍ ድርብ የሆነ ቅጣት እንደማይቀርለት ግን እርግጠኛ ነኝ። በማያውቀው ጉዳይ ገብቶ ለዘራው መርዝም በአጭር ጊዜ (ምናልባትም ከሳምንት ባነሰ ጊዜ) እራሱ በተናገረበት ብእር ትልቅ ቡጢ፣ ስጉማ እንደማይቀርለትም እርግጠኛ ነኝ።  ለሌሎች ርዕሱ ጉዳዮችም ቢጢዎች ብቅ ማለታቸው  የጀመረ ቢሆንም የበለጠ እንደሚነጉዱ ተስፋ አለኝ። 

አሁን ለእኔ አንድ ነገር ብልጭ ያለልኝ መሰለኝ። ተስፋዬ መጽሃፉን በማተሚያ ቤት ችግር ያሳበበው መጽሐፉ ቢታተም እና ወደ ገበያ ላይ ቢወጣ ብዙኃኑ ላያገኘው ይችላል፤ መርዜም በደንብ ሳይዘራ ይቀራል የሚል ስጋት አድሮበት ይመስለኛል። 

እኔ እኮ ‹አቶ› ተስፋዬ ገብረአብ እንደ ፓስተርነት እንደሚቃጣው አላወቅኩም ነበር? እኔ ለተስፋዬ የምመኝለት እንዲህ በማያውቀው እየገባ እውነትኛ ታሪክ ጻፍኩ ከሚለን፤ ነገሮችን በማጋነን የዘረኝነት ስብከት ከሚሰብክልን ይልቅ፤ እንደሚችለው ጥሩ ጥሩ ልብወለዶችን እንዲጽፍልን ነው። 

ቸር ያሰማን!